9. I ani do l 2000

Davia che la cundizion struturela ie cun l tëmp unida plutosc fetra y l local di jëuni ie unì dsarà per cuestions de segurëza, àn scumencià a fé proiec per na cësa nueva. Do che n se l’à fata ora cun la Nëus Jëuni, la Mujiga de Urtijëi y l Fotoclub n con’ dla gestion di locai, àn zarà ju la vedla sënta. Ti ani ntan l frabi­camënt ie la Lia Mostra d’Ert trapineda cun i libri per trëi ani tla streda Sotria, te n local metù a desposizion da Edgar Moroder, ulache l univa nce metù a jì referac. Tl 2007 àn pona inaugurà la “Cësa per la junanza, ert y cultura”, che ie danter l auter nce la sënta dla Lia Mostra d’Ert. Da ntlëuta à la lia a desposizion na bela biblioteca d’ert cun za. 3.500 libri, sambën davierta al publich, y la sala dla mostres sun Plaza de Sant Antone, che vën nuzeda per d’uni sort de mani­festazions. L lëur cun y per i jëuni vën pona dantaldut metù a jì dala Nëus Jëuni Gherdëina.

Ntan che l univa frabicà la cësa nueva, ne n’òven nia a desposizion na sala dla mostres y perchël iel unit su l’idea de mëter a jì n valguna mostres te Sëlva y nce l simposium sun Juac.

Pra chisc simposiums, che ie unic urganisei cin’ ani ndolauter, fajòvel peadantaldut jënt da tlo, ma nce da oradecà. Leprò pra chësc simposium unìvel nce metù a jì na sëira de mujiga.

Pra l’atività di ani 2000 tucova nce leprò i viages, coche p.ej. ala Biennale de Unieja, a Ferrara, tla Svizra, a Berlin, a Amsterdam, a Viena y tla Provence.

Dal 2009 nchin al 2012 iel unì dat ora la zaita culturela “Puhin” cun articuli y poejies per ladin, talian, tudësch y n iede nce per latin. Tla redazion fòvel Ivan Senoner, Tobia Moroder, Simon Perathoner, Diego Perathoner, Fabio Perathoner y n struf alalongia nce Lukas Pitscheider.

N ucajion di 90 ani dla Lia Mostra d’Ert iel unì prejentà l film de Matthias Höglinger. Danter la risses dla truepa ntervistes tl film iel da audì ora che l Circolo fova belau la sëula luegia tla valeda, sibe per chël che reverda l aspet politich che nce chël culturel, che dajova l mesun de dì si minonga y de vester ndependënc y liedesc.

Dal 2018 incà vëniel metù a jì l filmfestival Dolomitale, sun scumenciadiva de Lukas Pitscheider. L prim ann iel unì metù a jì a Urtijëi da na grupa dl cunsëi dl Circolo y esterns, pona tl ann do ie l filmfestival Dolomitale deventà na lia nueva cun sënta tl Cirolo. Tl 2109 ie l festival unì metù a jì a livel de valeda.

Per finé via pòssel unì cunstatà che la Lia Mostra d’Ert à for pità n program scialdi rich per valorisé la cultura y l’ert. N possa bën dì che l Circolo ie stat y ie mo for na lia cun carater inuvatif, che à purtà y porta daniëura n vënt frësch cun nia puecia descuscions y critiches, ma che juda a giaurì nosta maniera de pensé de viers de minonghes plu liedies. Te duc chisc ani à la lia purtà pro a n gran arichimënt sozio-culturel te nosc luech y te nosta valeda. N gra ti va a duc chëi che à laurà cun gran mpëni per chësc fin.

© 2019 by Circolo - lia mostra d'ert

  • Facebook Clean

Antoniusplatz 102, 39046 St. Ulrich / Urtijëi (BZ)

tel. +39 377 5936350 / info@circolo.eu / StNr. 9402582011