Per se abiné adum danter la generazions desfrentes che à cunlaurà a fé ora dl Circolo chël ciche l ie aldidancuei, se on pensà ora n prugram desvalif danter prejentazions de ert, workshops, referac, performances de ert y mujiga. L prugram ie partì su te trei dis; da juebia ai 02.09. a sada ai 04.09. on metù ju n prugram de manifestazions che cëla de viers de l daunì. Te nosc mond aldidancuei for plu y plu digitel, ie l duvier dl ert tla sozietà mudà y la va de cialé ciun ciamps che l ert nfluesc sëuraprò. Cun l titul dla manifestazion “I proscimi 100 ani” ulessan mustré su, che l ert ne jirà mei perdù, ma coche bele da for tla storia se adatea enc aldidancuei l ert ai mesums y debujënns de nosc tëmp.
L prugram cuer manifestazions te duta trei la rujenedes dla valeda. L bel mescedoz danter prejentazions de jënt de nosc luech y autres che vën adalerch da plu dalonc ie de mpurtanza pervia de n barat nteressant danter minonghes desfrentes. I referenc y artis´c se desmostra de auta cualità y profesciunalità y speron che l sibe de arichimënt spirituel per chëi che vën a cialé pro.