• Circolo - Lia Mostra d'Ert

Bruno Vallazza

Updated: Jun 18

Gran ert ascunduda

N ann do la mort dl artista Bruno Vallazza (1935-2016) à la Lia Mostra d’Ert – Circolo de Urtijëi metù a jì na mostra cun si opres de fier

Ert – Bruno Vallazza ie stat n gran artista te Gherdëina. De zes dala sozietà al crià opres de fier da na gran forza y esprescività a chëles che l fova dastramp lià. L ne les lasciova nia udëi a uniun. Na mostra ndividuela a Urtijëi ne ëssel nia ulù fé. L ie perchël bel che la Lia Mostra d’Ert – Circolo à metù a jì propi na tel esposizion deberieda cun la vëidua de Bruno, Clara, y si doi mutans Irene y Sabine.

Na vita de zes dala sozietà

Bruno Vallazza (* 7 de jené 1935 – † 25 de utober 2016) ie l fi de Hermann Vallazza y l fra de Adolf y Markus Vallazza. Bruno à mparà l’ert dl fever da si pere Hermann Vallazza che fova n slosser d’ert y fajova rëies de fier per i vieresc, feriedes, cianciei, antines, crëujes de curtina y auter. Bruno Vallazza ie tosc zapà ora dla piedies de si pere, svilupan n si stil. Mez ann alalongia iel nce jit a mparé dal moster Berrocal a Treviso. L artista de Urtijëi à scumencià a crië scultures cun formes y grandëzes d’uni sort.

Chiche à cunesciù Bruno sà che l ova mé l’ert tl cë. Daviadechël ne se àl nia tan tëut dlaurela per si familia. L ova scumencià a schivé la jënt n generel. Bruno Vallazza ne fova nia bon de se identifiché y azeté n mond caraterisà dal consum y dal capitalism. L se ova perchël trat zeruch te si mond a liejer libri de ert, filosofia, storia, mujiga y natura. L ova n gran bujën de savëi for plu y plu, y de pensé do al senificat dla vita. La ujina Marina se lecorda mo che l stajova majera pert te si veranda a cunscidré chiche passova y a pensé do de chësc y ch’l auter. Sce l univa ju te butëiga pona ti cuntovel cie che l se ova studià ora. L scumenciova a cunté de vel' pensier, ma pona dijovel: “L ne joa pa mpo no nia che ie te l conte ajache tu ne me ntëndes’a mpo no nia.” Mpede dì ora si pensieres cun paroles àl scumencià for plu y plu a i lascé ora tl’ert. L laurova te si berstot, bel achiet via, fajan cosses de marueia.

Opres misteriëuses

L’opes de Bruno Vallazza ie n spiedl de si ana sota y de dut si gran savëi che l se ova arichì te si ani de stude ndividuel. Ël se ova dat ju cun poec y filosofs d’uni sort, scrijan su i pensieres plu nteresssanc te si diares y purtan ite chisc pensieres nce tla scultures. Te truepa scultures luna ora si nteres per la mitologia nordica. Formes urigineles, che semea bele nscila scialdi misteriëuses, vën sëuraprò decuredes cun la scritura nordica che les rënd mo plu misteriëuses.

Bruno Vallazza ne fova degun artista classich y ëngheno na persona classica. L cheder dl mond se àl fat tres si udleda critica y desfidënta de viers dla jënt. De materialism y consum ne n’ulòvel nia n savëi. Pervia de chësta mentalità y davia che l fova tan lià a si scultures ne n’ulòvel ëngheno nia mëter ora o vënder si opres. Ël vendova mé si opres canche l fova te na gran stënta y ova propi debujën de scioldi per sëuraviver. L ie perchël na bela cossa che l ie unit a s’l dé na mostra a Urtijëi te chëla che n possa udëi dut l gran repertoire de Bruno Vallazza.

Mostra tl Circolo

Pra la giaurida n vënderdi ai 15 de dezëmber iel unit adalerch truepa jënt a cunscidré l’opres. L presidënt dla Lia Mostra d’Ert Andreas Kondrak à lascià audì si legrëza che la mostra ie unida a s’l dé. La muta de Bruno Vallazza, Irene, à descrit drët bel coche la se lecorda si pere: “Bruno ie stat n ël che ie jit si streda nfat cie che i autri pensova. Nfat cie che l fajova, l restova for pra si unestà radicala. L fova autramënter y chësc vester autramënter ie nce mantenì te si scultures.” N ucajion dla giaurida à nce rujenà la ujina dl artista, Marina. Ëila se lecorda che Bruno vivova te cundizions do la rata miserables. L univa unitant via te butëiga a damandé zech sce l ova debujën. Sce zachei ulova unì a cumpré velch y sunova pra porta, pona ne ti giauriva Bruno nia for la porta. Sce n ulova cumpré velch da d’ël messoven jì via tla butëiga ulache l passova datrai ntëur la undesc.

Davia che mé puecia de si lëures ie unì vendui y si ert ne n’ie mo nia drë’ cunesciudes iel na bela cossa che l ie unit a s’l dé la mostra tla sala dla Lia Mostra d’Ert. La mostra sarà mo davierta nchin ai da merdi a vënerdi dala 16.30 ala 19.00, de sada y dumënia dala 10.00 ala 12.00 y dala 16.30 ala 19.00. Duc ie nviei de cuer a unì a ti cialé.

Sofia Stuflesser

Foto:

La berstot de Bruno Vallazza tla streda Rezia 283.

L’esposizion de Bruno Vallazza tla sala dla Lia Mostra d’Ert a Urtijëi.


bruno_vallazzadocx







0 views

© 2019 by Circolo - lia mostra d'ert

  • Facebook Clean

Antoniusplatz 102, 39046 St. Ulrich / Urtijëi (BZ)

tel. +39 377 5936350 / info@circolo.eu / StNr. 9402582011