• Circolo - Lia Mostra d'Ert

Filmfestival Dolomitale

Updated: Jun 18

8-11.11.2018


comunicat_stampa_filmfestival_dolomitale



Only the best films make it to the top!

La DOLOMITALE ie stat n suzes

De nuvëmber de chëst ann ie l mond dl chino te Südtirol unì arichì cun na manifestazion. L filmfestival DOLOMITALE ie unì metù a jì per l prim iede a Urtijëi. L se trata dl prim festival cun films lonc dl raion linguistich retoromann y dl segondo filmfestival de Südtirol.

Dai 8 ai 11 de nuvëmber dl 2018 iel unì mustrà films che à n liam persunel, geografich o tematich cun Südtirol. L ie nce unit adalerch produtëures dl film da oradecà che à respundù ala dumandes dl publich. L prugram ufiziel ie unì prejentà pra na cunferënza stampa d’utober.

L filmfestival à plajù

I urganisadëures dl filmfestival cun a cë Lukas Pitscheider, Milena Holzknecht y Dina Borsch à pudù cunstaté che la critica ie stata zënzauter positiva. Truepa jënt à laudà chësta scumenciadiva y l livel di films. De ndut iel unì dat ora feter 1600 chertes per i films, zënza cumpedé pea la jënt che ie unida ala manifestazions a pert, coche pra l cunzert di Madax. De ndut iel unì dat ora 58 bonns per duta la manifestazions dl festival (festivalpass). Ti cialan a chësta zifres possen propi dì che truepa persones à nuzà la ucajion de unì a cialé i 16 films y la masterclass. Cun chësc resultati e i urganisadëures sambën scialdi cuntënc.

Cuncors de films curc

Cun l festival ulova i urganisadëures nce sustenì i jëuni y ti dé l mesun de mparé a cunëscer d’autra jënt ora dl mond dl film. Perchël iel unì metù a jì n cuncors de films curc pra chëi che l à fat pea jënt de Südtirol o films che ie unì tëuc su n gran pert te Südirol. I films à durà danter 20 secunc y 20 menuc. Leprò fòvel films cun atëures, films documenteres y films sperimentei. I doi miëur films ie unì premiei n n sada ai 10 de nuvëmber cun n pest dl publich y n pest dla iuria. L produzënt de films de Persenon Daniel Andrew Wunderer à venciù l cuncors de films curc cun si film “Zuflucht“. La iuria à premià l film cun n bel pest de 1000 € y sëuraprò n program mentoring pra l IDM Film Fund & Commission. L regista descrij l film curt coche “cunfront fantastich cun la mucia y la ntoleranza dla persona.“

„Der Wolf“ de Benjamin Thum à venciù l pest dl publich. L à giapà n pest de 500 € y n bonn per n jol cun la Elikos. La iuria à sëuraprò tëut la dezijion de ti sëurandé na uneranza particulera a “Stato di Gloria“ de Matteo Vegetti, davia che l ie na comedia inuvativa che trata argumënc atuei politics.

Film de giaurida

L festival à scumencià cun n film dl produtëur de Gherdëina Martin Prinoth, che lëura y viv al didancuei a Hamburg. Si film „Die fünfte Himmelsrichtung“ trata dl destin de doi mutons adotifs de Urtijëi che ie jic tl Brasil a crì si ravises. Do la prejentazion de chësc film iel unì rujenà y pensà do truep. Chësc ie nce na finalità dl film y de cultura n generel. La dëssa nce muever i spetadëures y i fé pensé do.

Cialan dereviers pòssen dì che truep films, chëi per granc, jëuni, sculeies o mutons, nfat de cie tematica, à crià n cër’ dialogh danter la jënt. Y propi chësc dialogh y raport uman ie de gran mpurtanza tla era digitela te chëla che vivon. Udon che la tecnica possa nce vester positiva sce n cëla de la nuzé te na cërta maniera.

Masterclass

Pra la masterclass ai 10 de nuvëmber à rujenà la produzënta de films cunesciuda Natalie Halla dl‘Austria. Ëila à cuntà de si vita coche produtëura ndependënta de films y de coche l vën a s’l dé n film per l chino. La à nce pità na udleda do la cultrines de si film nuef ”Life in four Elements“.

Vijion per l daunì

Cun l filmfestival DOLOMITALE ie l cunsëi dla Lia Mostra d’Ert zapà sun tiera nueva y à trat ite nce l’ert dl film te si program. Cun l resultat ie chëi che à metù a jì l filmfestival zënzauter scialdi cuntënc. N vëija che l mpëni à purtà si fruc. I urganisadëures se tol pea chësta resonanza positiva nce per la urganisazion dl filmfestival de n auter ann, che à bele scumencià prësc do la manifestazion de chëst ann. N auter ann unirà l filmfestival bonamënter metù a jì tla prima o segonda ena de setëmber, acioche nce i turisć posse nuzé chësta manifestazion culturela.







© 2019 by Circolo - lia mostra d'ert

  • Facebook Clean

Antoniusplatz 102, 39046 St. Ulrich / Urtijëi (BZ)

tel. +39 377 5936350 / info@circolo.eu / StNr. 94025820211