Stimei apasciunei dl’ert y di crëps!
Son cuntënc de pudëi ve fé a savëi che l vën metù a jì la terza edizion dl Simposium Nternaziunel de scultura tl lën „ZIPLA…n juech tl 2018“. Zipla sarà l titul generel dl simposium. Pra chësc titul uniràl juntà leprò uni ann na tematica che vën crissa ora dal cunsëi dla Lia Mostra d’Ert - Circolo de Urtijëi. Cun la parola „zipla“ (che ie la forma imperativa de „ziplé“ ma à nce l senificat de „zipla, stela“), se svilupea inant l simposium dl Circolo, nvian i artisć a ziplé n juech tl lën, scumencian da n tram. L juech ne n’ie nia mé minà te si senificat dl’atività de “fé damat” ma nce te si formes plu astrates coche l juech dla lum, l juech dla formes o l juech coche matada.
I artisć che unirà cris ora puderà lauré pra si proiet artistich y prejenté si opres artejaneles tla cuntreda dolomitica amesa la natura a 2.100 metri sëura l livel dl mer. Da n lunesc, 30.07.2018 nchin a n dumënia, 05.08.2018 se trasfurmerà la mont de CIAMPINËI tl chemun de Sëlva te na berstot spetaculera d’ert sota l ciel daviert. Scultëures y artisć desmustrerà si capaziteies tecniches y artistiches, trasfurman n tòch de lën te n’opra d’ert. L material de scumenciamënt ie n tram de ca. 2,00 metri y 40-50 cm de larghëza.
N sada ai 4 d’agost 2018 dala 15.00 sarà pona la FINISSAGE y PREMIAZION cun prejentazion di lëures, valutazion della iuria, cunedida de chël/a che à venciù y na festa cun band.
Sëuraprò saràl tl medemo tëmp dl simposium nce la mostra persunela de Clara Mair, Marc Risch y Christoph Fuchs. Chisc trëi artisć jëuni ova venciù ex aequo la segonda edizion dl Simposium 2017 y possa perchël fé chëst ann la mostra persunela te Gherdëina.
De biei saluc,
l Cunsëi dla Lia Mostra d’Ert - Circolo de Urtijëi
