• Circolo - Lia Mostra d'Ert

Senteda generela

4.1.2019



circolo_generela2018
.docx
Download DOCX • 16KB




N program rich

Pra la senteda generela dl Circolo Lia Mostra d’Ert iel unì mustrà su l’atività drët rica fata ntan l ann

Ert – Nce chëst ann se à l cunsëi dl Circolo mpenià a pité n prugram rich y nteressant per jëuni y manco jëuni. Pra la generela ai 4 de jené à l presidënt Andreas Mayr Kondrak cumpedà su bën 30 manifestazions.

Mostres

Coche uni ann iel unì metù a jì de bela mostres. D’ansciuda iel stat la mostra “Picëi” de Josef Kostner, la mostra „Ancuntedes“ cun la Scola Profesciunela per l Artejanat Artistich de Urtijëi”, la mostra “La spersa” dl cunsëi dl Circolo y la mostra “Bekleiden” de Martin Pöll. Ntan i trëi mënsc d’instà fova pona la Bienela y perchël àn messù spusté la mostres che fova prugramedes d’instà a d’autonn. Te chisc mënsc iel pona stat la mostra de “La filigrana del vuoto” de Thomas Scalco y la mostra “Mudamënc de perspetiva” de Clara Mayr de Südtirol, Christoph Fuchs dla Svizra y Marc Risch de Liechtenstein che ova venciù l simposium l ann passà. Ala fin de nuvëmber iel mo stat la mostra „Equilibrio“ cun Tabata Arduini, Pierre Auzias, Gaia Biancotti, Alberto Boschetti, Andrea Celestino, Pietro Colmellere, Giacomo Deflorian, Lukas Mayr, Patrick Senoner, Ariel Trettel y Florian Tschurtschenthaler.

Vetrines

Coche da tradizion iel nce unitant da udëi vel’ vetrina nteressanta, cureda da Simon Perathoner. Tla prima vestrina dal titul ”Psychoterror“ fòvel da udëi Egon Rusina amesa fonins y njins tecnics, pona fòvel la vetrina “Gedankengang“ de Mirko Insam, la vetrina “Treue in der Wiese“ dl cunsëi dl Circolo y la vetrina di fii che ie mo for da udëi tla sala dl Circolo.

Symposium

Per l terzo iede iel unì metù a jì l simposium sun Ciampinëi, chëst ann n con’ dla tematica dl juech. Pra chësta edizion à fat pea Gaia Lionello, Valeria Stuflesser, Mariella Martinelli, Maylis Paris, Sophie Eymond, Johannes Herster, Antonio Costa y Marko Kostner. La iuria cun Hermann-Josef Runggaldier, Aron Demetz y Gregor Prugger à premià l lëur de Johannes Herster. Ntan l simposium iel nce mo stat n referat de Danila Serafini n con’ dl juech y n pubquiz.

Cunzerc

L presidënt Andreas Mayr Kondrak, che ie n gran apasciunà dla mujiga, se à cruzià de mëter a jì truep cunzerc tl 2018. De jené ie stata la “Singer Songwriter night” cun Phill Reynolds, Pascal Gamboni, Andreas Mayr Kondrak, Adam Demetz, Stefan Demetz, Marion Moroder, Tobias Dellago y Ivan Schenk. D’ansciuda fova pona l cunzert Uploadsounds on tour, na lingia de cunzerc che vën metuda a jì te dut l Euregio, chël uel dì te Südtirol, Trentin y Nordtirol. Te Gherdëina fòvel da audì la grupes “The Moorings“, “Rachet Bronco”, “Point Nemo” y Marion Moroder.

N arichimënt per l Circolo ie stat l fin dl’ena de cunzerc de utober. Tlo fòvel da audì l gran virtuose de chitara Andrea Valeri, che ie al mumënt un di miëur chitarisć de dut l mond. L di do iel pona mo stat l cunzert de Andreas Mayr Kondrak y Marion Moroder, y dla band Me & Marie. Nce pra chësta sëira iel unì pità mujiga de livel scialdi aut. Purempò iel stat da muië che pra tramedoi sëires fòvel manco jënt de chël che n se ova aspità. Per fertuna giapa l Circolo for n bel cuntribut dal Chemun, scenó ne pudëssen nia mëter a jì chisc cunzerc cun mujizisć de livel nternaziunel.

Café Loft Rooftop, Marcià de Segra Sacun y Dolomitale

D’agost iel unì gaurì per n di l Café Loft Rooftop tl terzo partimënt dl Circolo che fova mé na matada. La bar fova coche dit mé davierta n di, daldò iela unida stluta per richëza. L ie stat nteressant a udëi la reazion dla jënt pra chësta scumenciadiva.

L Marcià de Segra Sacun dl 2018 fova dedicà ala Dolomitale. Per chësta ucajion iel unì fat placac y depënc d’uni sort. L retlam per la Dolomitale à zënzauter purtà si fruc. Truepa jënt ie unida al scumenciamënt de nuvëmber a ti cialé ai films y a scuté su la spiegazions di regisć. Chësc gran suzes dla Dolomitale ie l merit de Lukas Pitscheider y de duc chëi che à judà ntëurite.

Sëires de film

Dlongia l filmfestival vëniel tl Circolo nce mustrà uni prim lunesc dl mëns n film nteressant y alternatif, chëst ann “The Cleaners”, “Human flow”, “The sqaure”, “Seeing voices”. L ie nce unì prejentà l film “Missus” n cunlaurazion cun la Union di Ladins de Gherdëina. L regista à cuntà nfurmazions nteressantes n con’ dl lingaz furlan tla dlieja dl Friul, che vën bele dai ani pruibì dal Vatican.

Dlongia la prejentazions de films iel nce unì prejentà la zaita d’ert “Vissidarte”, cun chëla che bele la redazion dl Puhin ova tëut su cuntat.

Coche udon ie l prugram dl ann passà stat drët rich y plën de sfumadures. L cunsëi se à purvà a jì sot ala spersa superfiziela dla realtà y de pité manifestazions alternatives che fej pensé plu sot. Nce chëst ann se purverà l cunsëi a mëter a jì scumenciadives cultureles nteressantes, speran de pudëi saludé un o l auter de vo pra la manifestazions!

Sofia Stuflesser

Foto:

La vetrina de fii tla sala dla Lia Mostra d’Ert.

N lëur de Patrick Senoner metù ora pra la mostra dla Scola Profesciunela per l Artejanat Artistich.

La vetrina “Gedankengang” de Mirko Insam.

Ntan l cunzert cun Andrea Valeri.

Recent Posts

See All

Senteda generela

SADA 03.01.15, ore 20.30 Uhr Senteda Generela dla Lia Mostra d’Ert L Cunsëi dl Circolo - Lia Mostra d'Ert Ve nvieia de cuer ala SENTEDA GENERELA n sada, ai 03.01.2015 dala 20.30 tla bibliotech dla L

© 2019 by Circolo - lia mostra d'ert

  • Facebook Clean

Antoniusplatz 102, 39046 St. Ulrich / Urtijëi (BZ)

tel. +39 377 5936350 / info@circolo.eu / StNr. 94025820211